اپنی چھت اپنا گھر پروگرام: پنجاب میں ایک لاکھ سے زائد بے گھر خاندانوں کو رہائش مل گئی

پنجاب حکومت کے “اپنی چھت اپنا گھر” پروگرام کے تحت رہائشی سہولتوں کی فراہمی کا عمل تیزی سے جاری ہے اور اب تک ایک لاکھ 1633 بے گھر خاندان اپنے گھر حاصل کر چکے ہیں۔

وزیر ہاؤسنگ پنجاب بلال یاسین کی زیر صدارت اجلاس میں پروگرام کی پیش رفت کا جائزہ لیا گیا۔ اجلاس کو بتایا گیا کہ ایک لاکھ 56 ہزار سے زائد خاندانوں کو گھروں کی تعمیر کے لیے بلاسود قرضے فراہم کیے جا چکے ہیں جبکہ مجموعی طور پر 208 ارب روپے سے زائد کی رقم تقسیم کی گئی ہے۔

بریفنگ کے مطابق صوبے میں اس وقت 32 ہزار 412 گھر زیر تعمیر ہیں اور مزید 7 ہزار 792 خاندانوں کو جلد قرضوں کی فراہمی متوقع ہے۔

اجلاس سے خطاب کرتے ہوئے بلال یاسین نے کہا کہ حکومت عام شہریوں کو اپنی رہائش فراہم کرنے کے عزم پر قائم ہے۔ انہوں نے متعلقہ حکام کو ہدایت کی کہ پروگرام کا دائرہ کار شہری اور دیہی علاقوں میں مزید بڑھایا جائے۔

انہوں نے مزید کہا کہ آئندہ مالی سال میں مزید ایک لاکھ خاندانوں کو بلاسود قرضے فراہم کرنے کا ہدف مقرر کیا گیا ہے تاکہ زیادہ سے زیادہ افراد اپنے گھر کا خواب پورا کر سکیں۔