محکمہ داخلہ پنجاب نے تمام اسلحہ ڈیلرز کی ڈیجیٹل انوینٹری لازم قرار دیدی

لاہور: محکمہ داخلہ پنجاب نے صوبے بھر کے تمام اسلحہ ڈیلرز کے لیے ڈیجیٹل انوینٹری کا نظام لازمی قرار دیتے ہوئے موجودہ سٹاک اور روزمرہ خرید و فروخت کا مکمل ریکارڈ آن لائن پورٹل پر درج کرنے کی ہدایت جاری کر دی ہے۔

ترجمان محکمہ داخلہ پنجاب کے مطابق بزنس آرمز لائسنس (BAL) ہولڈرز کے لیے ‘پنجاب آرمز لائسنس انوینٹری ماڈیول’ باقاعدہ طور پر نافذ کر دیا گیا ہے۔ نئے نظام کے تحت ہر اسلحہ ڈیلر کو اپنے پاس موجود تمام بندوقوں، گولیوں اور متعلقہ لوازمات کے سٹاک کا مکمل اندراج محکمہ داخلہ کے آن لائن پورٹل پر کرنا ہوگا، جبکہ آئندہ کی تمام تر خریدو فروخت کا ریکارڈ بھی ساتھ ساتھ اپ ڈیٹ کیا جائے گا۔

محکمہ داخلہ نے تمام ڈیلرز کو اپنے موجودہ سٹاک کی آن لائن انوینٹری مکمل کرنے کے لیے 26 اگست 2026 کی حتمی تاریخ (ڈیڈ لائن) دی ہے۔ اس حوالے سے صوبے کے تمام ڈپٹی کمشنرز کو اپنے اپنے اضلاع کے ڈیلرز کی فہرستیں فراہم کر دی گئی ہیں، جو انوینٹری کے عمل کو یقینی بنا کر رپورٹس محکمہ داخلہ پنجاب کو ارسال کریں گے۔ حکومت نے واضح کیا ہے کہ 26 اگست تک پورٹل پر اندراج میں ناکام رہنے والے ڈیلرز کا لائسنس معطل، کاروبار سیل اور بھاری جرمانے عائد کیے جا سکتے ہیں۔

اسلحہ ڈیلرز کی رہنمائی اور پورٹل کے استعمال کی آگاہی کے لیے محکمہ داخلہ سوموار 24 اگست 2026 کو پنجاب فرانزک سائنس اتھارٹی آڈیٹوریم میں ایک خصوصی تربیتی ورکشاپ منعقد کر رہا ہے۔ ڈیلرز اپنے متعلقہ ڈپٹی کمشنر کے دفاتر سے آن لائن سیشن میں شرکت کر کے پورٹل پر انوینٹری درج کرنے کا طریقہ کار سیکھ سکیں گے۔