حکومت پنجاب کا تعلیمی اداروں کی مانیٹرنگ فوجی اہلکاروں سے کرانے کا فیصلہ

حکومتِ پنجاب نے صوبے کے 22 اضلاع کے تعلیمی اداروں کی مانیٹرنگ کے لیے پنجاب ایجوکیشن فاؤنڈیشن (پیف) کے تحت ریٹائرڈ فوجی اہلکاروں کی بطور ‘مانیٹرنگ اینڈ ایویلیوئشن افسرز’ (MEOs) بھرتی کرنے کی منظوری دے کر عمل کا آغاز کر دیا ہے۔ ایک سالہ کنٹریکٹ کی بنیاد پر ہونے والی ان بھرتیوں کے لیے 7 ستمبر تک درخواستیں طلب کی گئی ہیں، جس میں 60 ہزار روپے ماہانہ تنخواہ، مراعات اور سرکاری موٹر سائیکلز بھی فراہم کیے جائیں گے۔ پہلے مرحلے میں 28 افسران (21 فوجی اور 7 سویلین) بھرتی کیے جائیں گے۔ دوسری جانب محکمہ تعلیم پنجاب نے صوبہ بھر میں ڈیلی ویجز پر کام کرنے والے ڈیڑھ لاکھ اسکول ٹیچنگ انٹرنز کے کنٹریکٹ میں مارچ 2027 تک 9 ماہ کی توسیع کا فیصلہ کرتے ہوئے سمری وزیراعلیٰ کو ارسال کر دی ہے۔