پنجاب حکومت کا لاہور میں سہ روزہ بسنت کی تاریخوں کا باضابطہ اعلان

حکومتِ پنجاب نے صوبائی دارالحکومت لاہور میں کئی برسوں کے وقفے کے بعد ‘محفوظ بسنت’ کی باضابطہ تاریخوں کا اعلان کر دیا ہے، جس کے تحت شہر میں بسنت کا تہوار 12، 13 اور 14 مارچ 2027ء کو منایا جائے گا۔

سیکرٹری داخلہ پنجاب احمد جاوید کی زیرِ صدارت منعقدہ اعلیٰ سطح کے اجلاس میں فیصلہ کیا گیا کہ بسنت کی اجازت کے ساتھ ساتھ انسانی جانوں کی حفاظت کے لیے سخت ضوابط نافذ کیے جائیں گے۔ سیکرٹری داخلہ نے واضح کیا کہ شہر کی کسی بھی غیر محفوظ چھت پر پتنگ بازی کی ہرگز اجازت نہیں ہوگی۔ تمام مالکانِ مکانات کے لیے لازمی قرار دیا گیا ہے کہ وہ 31 دسمبر 2026ء سے قبل اپنی چھتوں کے گردا گرد کم از کم ساڑھے 3 فٹ کی حفاظتی دیوار (پراپٹ وال) تعمیر کروائیں اور چھتوں کی پائیداری کو یقینی بنائیں۔

اجلاس میں ڈپٹی کمشنر لاہور کو ہدایت کی گئی کہ وہ پرانی اور بوسیدہ عمارتوں کی چھتوں کا مکمل معائنہ کروائیں اور غیر تسلی بخش رپورٹس کی صورت میں ایسی عمارتوں پر پتنگ بازی پر مکمل پابندی عائد کی جائے۔ مزید برآں، حکومت نے بجلی کی تاروں کو محفوظ بنانے اور مقررہ قانونی ضوابط کے مطابق ڈور و پتنگوں کی تیاری اور فروخت کی سخت نگرانی کا حکم بھی جاری کیا ہے۔