پنجاب حکومت کا وفاق سے 10 لاکھ ٹن گندم کیلئے باضابطہ رابطہ

پنجاب حکومت نے صوبے میں گندم کی مارکیٹ کو مستحکم رکھنے اور قیمتوں کو کنٹرول میں رکھنے کے لیے پاکستان ایگری کلچرل اسٹوریج اینڈ سروسز کارپوریشن (پاسکو) سے 10 لاکھ میٹرک ٹن گندم کے حصول کے لیے وفاقی حکومت سے باضابطہ رابطہ کر لیا ہے۔ پنجاب کابینہ کی منظوری کے بعد اس سلسلے میں وزارتِ قومی غذائی تحفظ کو ایک رسمی مراسلہ ارسال کر دیا گیا ہے۔ حکام کے مطابق صوبے کو پہلے سے منظور شدہ 2 لاکھ میٹرک ٹن گندم کی خریداری کی اجازت برقرار رہے گی، جبکہ اضافی 8 لاکھ میٹرک ٹن گندم کی فراہمی کے لیے نئی درخواست کی گئی ہے۔ حکام نے مزید بتایا کہ پاسکو کے پاس پنجاب کے حصے کی 2 لاکھ میٹرک ٹن گندم پہلے سے موجود ہے اور نئی درخواست کی منظوری کے بعد یہ مجموعی مقدار 10 لاکھ میٹرک ٹن ہو جائے گی۔ اس اقدام کا بنیادی مقصد مارکیٹ میں گندم کی بلا تعطل رسد کو یقینی بنانا اور آٹے کی قیمتوں کو کنٹرول میں رکھنا ہے۔