پنجاب بھر میں دفعہ 144 کے نفاذ میں 7 روز کی توسیع

پنجاب بھر میں امن و امان کے پیش نظر دفعہ 144 کے نفاذ میں مزید 7 روز کی توسیع کر دی گئی ہے۔پنجاب میں ہر قسم کے احتجاج، جلسے، جلوس، ریلیاں، دھرنے، اجتماع اور عوامی سرگرمیوں پر پابندی برقرار رہے گی۔
دفعہ 144 کے تحت چار یا زائد افراد کے عوامی مقامات پر جمع ہونے پر مکمل پابندی ہوگی۔ صوبے بھر میں اسلحہ کی نمائش اور لاؤڈ اسپیکر کے استعمال پر بھی پابندی برقرار ہے۔ اشتعال انگیز، نفرت آمیز اور فرقہ وارانہ مواد کی اشاعت و تقسیم پر مکمل پابندی عائد کی گئی ہے۔
محکمہ داخلہ کے مطابق اس فیصلے کا مقصد امن و امان کا قیام، انسانی جانوں اور املاک کا تحفظ ہے۔ سیکیورٹی خطرات کے پیش نظر عوامی جلوس اور دھرنے دہشت گردوں کے لیے سافٹ ٹارگٹ ثابت ہو سکتے ہیں، جب کہ شرپسند عناصر عوامی احتجاج کا فائدہ اٹھا کر ریاست مخالف سرگرمیوں کو فروغ دے سکتے ہیں۔
نوٹیفکیشن کے مطابق یہ پابندی ہفتہ 15 نومبر تک نافذ رہے گی۔ پابندی کا اطلاق شادی کی تقریبات، جنازے اور تدفین پر نہیں ہوگا۔ سرکاری فرائض کی انجام دہی پر موجود افسران و اہلکار اور عدالتیں بھی اس پابندی سے مستثنیٰ ہیں۔ لاؤڈ اسپیکر کا استعمال صرف اذان اور جمعہ کے خطبہ تک محدود رکھا گیا ہے۔
محکمہ داخلہ نے عوامی آگاہی کے لیے دفعہ 144 کے نفاذ کی تشہیر بڑے پیمانے پر کرنے کی ہدایت جاری کر دی ہے۔