حکومتِ پنجاب کا سرکاری محکموں میں ڈاؤن سائزنگ کا فیصلہ، 5 رکنی کمیٹی قائم

حکومتِ پنجاب نے متعدد سرکاری محکموں میں ڈاؤن سائزنگ کا فیصلہ کرتے ہوئے ملازمین کی تعداد اور خالی آسامیوں کے جائزے کے لیے پانچ رکنی کمیٹی قائم کر دی ہے، جس کا باضابطہ نوٹیفکیشن بھی جاری کر دیا گیا ہے۔

نوٹیفکیشن کے مطابق کمیٹی ایڈیشنل چیف سیکریٹری پنجاب کی سربراہی میں کام کرے گی، جبکہ اس میں سیکریٹری انڈسٹریز اینڈ کامرس، ایڈیشنل سیکریٹری فنانس، ایڈیشنل سیکریٹری اور ایک نامزد نمائندہ شامل ہوگا۔

حکومت کے مطابق کمیٹی کو وسیع اختیارات حاصل ہوں گے، جو تمام محکموں میں اضافی ملازمین کی نشاندہی، غیر ضروری اسامیوں کے خاتمے اور انتظامی نظام کی بہتری کے لیے سفارشات مرتب کرے گی۔

حکام کا کہنا ہے کہ اس اقدام کا مقصد سرکاری اداروں میں کارکردگی بڑھانا اور اخراجات کو مؤثر انداز میں کنٹرول کرنا ہے۔