توانائی بچت اقدامات: پنجاب میں سرکاری دفاتر کے اوقات کار محدود

عالمی کشیدگی کے باعث تیل کی سپلائی متاثر ہونے کے خدشات کے پیش نظر پنجاب حکومت نے توانائی بچت کے اقدامات شروع کر دیے ہیں، جس کے تحت سرکاری دفاتر کے اوقات کار محدود کر دیے گئے ہیں۔

حکومت کی پالیسی کے مطابق متعدد سرکاری دفاتر اب ہفتے میں صرف چار دن کھلیں گے، جبکہ جمعہ، ہفتہ اور اتوار کو کئی ادارے بند رہیں گے۔ توانائی بچت پالیسی کے پہلے ہفتے کے تحت لاہور کے اہم انتظامی ادارے جزوی طور پر بند رہے اور شہریوں کو محدود سروسز فراہم کی گئیں۔

جزوی تعطیل کے دوران لاہور ڈویلپمنٹ اتھارٹی (ایل ڈی اے)، واسا، پی ایچ اے اور محکمہ ٹرانسپورٹ کے بعض دفاتر بند رہے، جبکہ پنجاب ماس ٹرانزٹ اتھارٹی، محکمہ ہاؤسنگ اور محکمہ سی اینڈ ڈبلیو کے دفاتر بھی بند رکھے گئے۔

حکام کے مطابق توانائی اور پٹرولیم مصنوعات کے استعمال میں کمی کے لیے یہ اقدامات کیے گئے ہیں، تاہم شہریوں کو بنیادی سہولیات فراہم کرنے کے لیے ضروری عملہ ڈیوٹی پر موجود رہا۔

واسا کے ٹیوب ویلز اور ڈسپوزل سٹیشنز کے آپریٹرز معمول کے مطابق ڈیوٹی سرانجام دے رہے ہیں، اور ایل ڈی اے کے دفاتر بند ہونے کے باوجود شہر میں جاری ترقیاتی کام بدستور جاری ہیں۔ حکومت کا کہنا ہے کہ توانائی بحران کے ممکنہ خدشات کے پیش نظر سرکاری آپریشنز محدود کیے گئے ہیں، جبکہ شہری سہولیات برقرار رکھنے کے لیے جزوی ڈیوٹی سسٹم نافذ کیا گیا ہے۔