وزیراعلیٰ مریم نواز نے پنجاب اکنامک ٹرانسفارمیشن کمیٹی تشکیل دے دی

وزیراعلیٰ پنجاب مریم نواز شریف نے صوبے میں معاشی ترقی کو فروغ دینے کے لیے پنجاب اکنامک ٹرانسفارمیشن کمیٹی تشکیل دے دی ہے۔

ذرائع کے مطابق 11 رکنی کمیٹی کی سربراہی سینئر صوبائی وزیر مریم اورنگزیب کریں گی جبکہ سیکرٹری خزانہ کمیٹی کے سیکرٹری ہوں گے۔

اطلاعات کے مطابق پنجاب اکنامک ٹرانسفارمیشن کمیٹی ضلعی سطح پر اکنامک میپنگ کے ذریعے معاشی امکانات کی نشاندہی کرے گی۔ کمیٹی اضلاع میں انڈسٹری کلسٹرز قائم کرنے کے لیے مختلف شعبوں کی ترجیحات بھی طے کرے گی۔

کمیٹی قابلِ عمل معاشی اشاریے مرتب کرنے کے ساتھ ساتھ قلیل المدتی اور طویل المدتی ٹائم لائن بھی مقرر کرے گی۔ اس کے علاوہ نجی شعبے کے اسٹیک ہولڈرز سے مشاورت کے بعد مختلف شعبوں کے لیے قابلِ عمل منصوبہ بھی تیار کیا جائے گا۔

ذرائع کے مطابق کمیٹی سکل ڈویلپمنٹ پروگرامز کے ذریعے صنعتوں کی ضروریات کے مطابق انسانی وسائل تیار کرنے پر توجہ دے گی۔ اس کے ساتھ مقامی طور پر تیار کردہ ویلیو ایڈڈ مصنوعات کو عالمی ویلیو چین سے منسلک کرنے کے لیے بھی اقدامات کیے جائیں گے۔

مزید برآں کمیٹی صوبے میں معاشی ترقی کے لیے پائیدار ایکو سسٹم قائم کرنے پر بھی کام کرے گی۔ اس سلسلے میں مختلف شہروں کے لیے مخصوص صنعتی شعبوں کی تجاویز بھی دی گئی ہیں، جن میں ساہیوال میں ڈیری پروڈکٹس، لاہور میں آئی ٹی سافٹ ویئر، گارمنٹ سٹی، میٹ اور لیدر، فیصل آباد میں ٹیکنیکل ٹیکسٹائل، فرنیچر سٹی اور ڈیری پراسیسنگ، گوجرانوالہ میں سرجیکل اور اسپورٹس انڈسٹری جبکہ گجرات میں فین، رائس ایکسپورٹ اور اپلائنسز شامل ہیں۔