پنجاب میں پبلک پرائیویٹ پارٹنرشپ کا آغاز، 5 روڈ منصوبے نجی شعبے کے سپرد

وزیراعلیٰ پنجاب مریم نواز شریف نے پنجاب پبلک پرائیویٹ پارٹنرشپ اتھارٹی کے تحت روڈز کے 5 اہم منصوبوں کا ڈیجیٹل افتتاح کر دیا ہے، جن کے تحت ان سڑکوں کا انتظام نجی شعبے کے سپرد کر دیا گیا ہے۔ اس اقدام سے حکومت پنجاب کو 22 ارب روپے کا ریونیو حاصل ہوگا اور ان شاہراہوں پر جدید ترین الیکٹرانک ٹول پلازے قائم کیے جائیں گے۔ پراجیکٹس میں مریدکے-نارووال (80 کلومیٹر)، شکرگڑھ-نارووال (33 کلومیٹر)، فیصل آباد رنگ روڈ (97 کلومیٹر)، فیصل آباد-ساہیانوالہ (52 کلومیٹر) اور فیصل آباد-سمندری-رجانہ (56 کلومیٹر) روڈز شامل ہیں، جن کی دیکھ بھال اور ٹول کلیکشن سات سال کے لیے پرائیویٹ کنٹریکٹر کے ذمے ہوگی۔ اس کے علاوہ صوبے بھر میں ہاسٹلز، ہسپتالوں، ماڈرن ٹرک ٹرمینلز اور سیاحتی ترقی کے مزید درجنوں منصوبے بھی پی پی پی موڈ پر پائپ لائن میں ہیں۔