پنجاب میں پہلی بار سیلاب کی پیشگی اطلاع کیلئے ڈرون مانیٹرنگ شروع

وزیراعلیٰ پنجاب مریم نواز شریف کی خصوصی ہدایت پر صوبے کی تاریخ میں پہلی مرتبہ سیلاب کی پیشگی اطلاع اور نگرانی کے لیے جدید ڈرون مانیٹرنگ سسٹم کا آغاز کر دیا گیا ہے۔ حکام کے مطابق، تمام اہم بیراجوں، دریاؤں اور ہیڈ ورکس کی سیف سٹی ڈرون سرویلنس کے ذریعے کڑی نگرانی کی جا رہی ہے تاکہ پانی کے بہاؤ اور ممکنہ سیلابی ریلوں کی بروقت نشاندہی کر کے فوری حفاظتی اقدامات کیے جا سکیں۔

ڈرون مانیٹرنگ سے حاصل کردہ تازہ ترین صورتحال کے مطابق  جھنگ کے تریموں بیراج اور پاکپتن میں دریائے راوی و ستلج میں پانی کا بہاؤ اور کٹاؤ معمول کے مطابق ہے۔ اس کے علاوہ سرگودھا (دریائے چناب پر طالب والا پل)، خانیوال (ہیڈ سدھنائی) اور منڈی بہاؤالدین (رسول بیراج) پر بھی ڈرونز کے ذریعے تسلی بخش نگرانی کی گئی۔ حکام کے مطابق ساہیوال میں کتب شہانہ کے قریب نچلے درجے کا سیلاب ریکارڈ کیا گیا ہے، جبکہ سیالکوٹ کے ہیڈ مرالہ کے مقام پر پانی کا بہاؤ 1 لاکھ 74 ہزار کیوسک ریکارڈ کیا گیا ہے۔

اس جدید نظام کا مقصد کسی بھی ہنگامی صورتحال میں بروقت ریسکیو اور ریلیف آپریشنز کو یقینی بنانا اور انسانی جان و مال کے نقصان کو کم سے کم کرنا ہے۔