وزیراعلیٰ مریم نواز کی زیر صدارت پنجاب کابینہ کا اجلاس، اہم سمریاں پیش

وزیراعلیٰ پنجاب مریم نواز شریف کی زیر صدارت پنجاب کابینہ کا 31واں اجلاس شروع ہو گیا۔ اجلاس میں 30ویں کابینہ اجلاس کی کارروائی کی توثیق کی سمری پیش کی گئی۔

اجلاس کے دوران قائمہ کمیٹی برائے قانون سازی و نجکاری اور قائمہ کمیٹی برائے قانون و امن و امان کے مختلف اجلاسوں کی کارروائی اور منٹس کابینہ کے سامنے پیش کیے گئے۔کابینہ کے ایجنڈے میں اساتذہ کے طبی اخراجات سے متعلق سمری، این ایف سی ایوارڈ پر عملدرآمد سے متعلق ششماہی رپورٹس، پنجاب حکومت کے آڈٹ سال 2019–20 اور 2022–23 کی رپورٹس بھی شامل تھیں۔اجلاس میں مسیحی اور ہندو شادی لائسنس کے اجرا اور رجسٹرارز کی تقرری، پراپرٹی قوانین میں ترمیم، ٹیلی کام ٹاورز کے لیے سرکاری اراضی لیز کی شرائط اور ملکیتی حقوق دینے سے متعلق گرانٹس کی شرائط پر بھی غور کیا گیا۔کابینہ کو پی آئی ای ڈی ایم سی کے میمورنڈم میں ترمیم، پنجاب ہائی سیکیورٹی زونز ایکٹ 2025، ٹریفک وارڈن سروس رولز اور ہائی پوٹینشل ڈیولپمنٹ اسکیم میں ترامیم سے متعلق سمریاں بھی پیش کی گئیں۔اس کے علاوہ لوکل گورنمنٹ سروس رولز 2018 میں ترمیم، آئینی ترمیمی بل 2025، پی ایچ اے ٹی اے آرڈیننس 2002 میں ترامیم، سوشل ویلفیئر و بیت المال کی پنٹا پالیسی اور ماحولیاتی تحفظ ایکٹ 1997 میں ترامیم کی سمریاں کابینہ کے سامنے رکھیں گئیں۔

اجلاس میں کے ایف ڈبلیو بینک سے 15 ملین یورو گرانٹ معاہدے، پنجاب چیریٹیز ایکٹ 2018 کے تحت کمیشن کے قیام، ملتان اور بہاولپور بلڈ سینٹرز کے معاہدوں کی تجدید، پولیس رولز 1934 میں ترامیم اور سی سی ڈی میں خصوصی جنسی جرائم تفتیشی یونٹس کے قیام سے متعلق سمریاں بھی پیش کی گئیں۔