کلینک میں فائرنگ سے پی ٹی آئی رہنما قتل، فوٹیج سامنے آ گئی

لاہور میں گلبرگ کے علاقے غالب مارکیٹ کے قریب ایک کلینک میں نامعلوم موٹر سائیکل سواروں نے فائرنگ کر کے اوکاڑہ سے تعلق رکھنے والے پی ٹی آئی کے ایم پی اے ٹکٹ ہولڈر اور پیشہ ور ٹھیکیدار عبداللہ طاہر کو قتل کر دیا جبکہ ایک ڈاکٹر زخمی ہو گئے۔ ڈی آئی جی آپریشنز فیصل کامران کے مطابق عبداللہ طاہر فزیو تھراپی کے لیے کلینک آئے ہوئے تھے، فائرنگ کے دوران ڈاکٹر کے بازو پر گولی لگی تاہم ان کی حالت خطرے سے باہر ہے۔ واقعے کی سی سی ٹی وی فوٹیج بھی سامنے آ گئی ہے جس میں 2 ملزمان کو ہیلمٹ پہنے کلینک کے اندر داخل ہوتے اور واردات کے بعد موٹر سائیکل پر فرار ہوتے دیکھا جا سکتا ہے۔ پولیس کا کہنا ہے کہ مقتول کا کچھ ماہ قبل اوکاڑہ میں لڑائی جھگڑا ہوا تھا، لاش کو مردہ خانے منتقل کر کے تمام پہلوؤں پر تفتیش شروع کر دی گئی ہے۔