پی ٹی آئی: ناجائز حکومت سے بات نہیں ہوگی، مذاکرات تحریک تحفظ آئین کے ذریعے

سابق صوبائی وزیر پی ٹی آئی کامران خان بنگش نے میڈیا سے گفتگو کرتے ہوئے کہا کہ بانی پارٹی سے ملاقات کے لیے آج اڈیالہ جیل پہنچے لیکن ملاقات کی اجازت نہیں دی گئی۔ ان کا کہنا تھا کہ بانی اور ان کی اہلیہ کو قید تنہائی میں رکھا گیا ہے اور ان کے سردیوں کے کپڑے بھی نہیں پہنچائے جا رہے۔

کامران خان بنگش نے مزید کہا کہ پی ٹی آئی آئین اور قانون کے دامن کو مضبوطی سے تھامے ہوئے ہے اور عدلیہ کے خلاف آئینی ترامیم کے ذریعے سازشیں کی جا رہی ہیں۔ انہوں نے فواد چودھری اور اسد عمر سمیت پارٹی کے دیگر رہنماﺅں کے حوالے سے کہا کہ جو لوگ پارٹی چھوڑ چکے ہیں ان کی واپسی کا فیصلہ بانی کریں گے۔

رکن قومی اسمبلی ساجد خان مہمند نے کہا کہ فارم 47 کے وزیراعظم نے مذاکرات کی دعوت دی، لیکن پارٹی کا موقف ہے کہ ناجائز حکومت سے بات نہیں ہوگی۔ بانی نے مذاکرات کا اختیار محمود خان اچکزئی کو دیا ہے، جو پہلے ہی آمادگی کا اظہار کر چکے ہیں۔

رکن صوبائی اسمبلی پنجاب فیصل خان نیازی نے واضح کیا کہ پی ٹی آئی میں کوئی تقسیم نہیں ہے اور غیر متعلقہ لوگ مذاکرات کی بات کریں تو وہ پارٹی سے تعلق نہیں رکھتے۔ تمام مذاکرات تحریک تحفظ آئین کے پلیٹ فارم سے ہی ہوں گے۔