پی ٹی آئی رہنماؤں بیرسٹر گوہر اور اسد قیصر کی مولانا فضل الرحمان سے ملاقات: حکومت سے مذاکرات کا اختیار دے دیا

پاکستان تحریک انصاف (پی ٹی آئی) کے چیئرمین بیرسٹر گوہر علی خان اور سابق اسپیکر قومی اسمبلی اسد قیصر نے جمعیت علمائے اسلام (ف) کے سربراہ مولانا فضل الرحمان سے ایک اور اہم ملاقات کی ہے، جس میں ملک کی درپیش سیاسی صورتِ حال اور بالخصوص خیبرپختونخوا میں پیدا ہونے والے آئینی و سیکیورٹی بحران پر تفصیلی مشاورت کی گئی۔

زرائع کے مطابق ملاقات کے دوران پی ٹی آئی قیادت نے مولانا فضل الرحمان کو وفاقی حکومت کے ساتھ مذاکرات کا مکمل اختیار اور مینڈیٹ سونپ دیا ہے۔ ذرائع کا بتانا ہے کہ مولانا فضل الرحمان نے وزیراعظم شہباز شریف کے ساتھ ہونے والی حالیہ اعلیٰ سطحی ملاقات کی تمام تفصیلات اور وفاق کے تحفظات سے پی ٹی آئی رہنماؤں کو آگاہ کیا۔ مولانا فضل الرحمان نے اعادہ کیا کہ وہ خیبرپختونخوا میں کسی بھی قسم کی ایمرجنسی یا گورنر راج کے نفاذ کے حامی نہیں ہیں اور مسئلے کا سیاسی حل چاہتے ہیں۔ اپوزیشن ذرائع کے مطابق تحریک انصاف کی کور کمیٹی اور سیاسی کمیٹی بھی آج رات مولانا فضل الرحمان کو باضابطہ طور پر مذاکرات کا اختیار دینے کی منظوری دے گی۔