انسدادِ دہشت گردی عدالتوں کے فیصلوں پر چیئرمین پی ٹی آئی بیرسٹر گوہر کی شدید تشویش، انصاف پر سنگین سوالات اٹھا دیے

چیئرمین پاکستان تحریکِ انصاف بیرسٹر گوہر نے پی ٹی آئی کی مرکزی قیادت کو انسدادِ دہشت گردی عدالتوں کی جانب سے دی جانے والی مسلسل سزاؤں پر شدید تشویش کا اظہار کرتے ہوئے ان فیصلوں کو ناانصافی، غیر انسانی اور ظالمانہ قرار دیا ہے۔

سماجی رابطے کی ویب سائٹ ایکس (ٹوئٹر) پر جاری بیان میں بیرسٹر گوہر نے کہا کہ یہ پانچواں موقع ہے کہ ایک ہی الزام کے تحت 10، 10 سال کی سزائیں سنائی گئی ہیں، جبکہ چھٹا فیصلہ متوقع ہے اور ساتواں فیصلہ پیر کو آنے کا امکان ہے۔ ان کے مطابق اگر یہ سلسلہ جاری رہا تو مجموعی سزا 70 سال تک پہنچ سکتی ہے۔

چیئرمین پی ٹی آئی نے مزید بتایا کہ اس کے علاوہ مزید سات مقدمات بھی زیرِ سماعت ہیں، جن میں چار انسدادِ دہشت گردی عدالت نمبر ون اور تین انسدادِ دہشت گردی عدالت نمبر تھری میں چل رہے ہیں۔

ان کا کہنا تھا کہ اگر ان مقدمات میں بھی سزائیں سنائی گئیں تو مجموعی قید 140 سال تک جا سکتی ہے، حالانکہ تمام مقدمات ایک ہی دن کے واقعے اور ایک ہی الزام، یعنی ریاست کے خلاف مبینہ سازش، سے متعلق ہیں۔

بیرسٹر گوہر کے مطابق ملزمان میں سے تین افراد کی عمریں 70 سال سے زائد ہیں اور وہ خود اور ان کے اہلِ خانہ پہلے ہی شدید ذہنی اور جسمانی اذیت کا سامنا کر چکے ہیں۔

انہوں نے کہا کہ اس نوعیت کے فیصلے انصاف کے بنیادی تقاضوں اور انسانی اقدار کے منافی ہیں۔ چیئرمین پی ٹی آئی نے حکام سے مطالبہ کیا کہ اس عمل کو فوری طور پر روکا جائے، صورتحال کو بہتر بنایا جائے اور متاثرہ خاندانوں کو اس اذیت سے نجات دلائی جائے۔