اعجاز چوہدری کا سزا معطلی کیلئے سپریم کورٹ سے رجوع

پاکستان تحریک انصاف (پی ٹی آئی) کے رہنما اعجاز چوہدری نے شادمان تھانے میں درج مقدمے میں سزا معطلی کے لیے سپریم کورٹ سے رجوع کرتے ہوئے لاہور ہائیکورٹ کے 28 اپریل کے فیصلے کو چیلنج کر دیا ہے۔ سپریم کورٹ میں دائر درخواست میں استدعا کی گئی ہے کہ ٹرائل کورٹ کے 11 اگست 2025 کے فیصلے کو معطل اور لاہور ہائیکورٹ کا حکم کالعدم قرار دیا جائے۔ اعجاز چوہدری نے مؤقف اپنایا ہے کہ ان کا کوئی سابقہ فوجداری ریکارڈ نہیں ہے اور پورا مقدمہ زمان پارک کی مبینہ ملاقاتوں اور سازش کے الزام پر مبنی ہے۔ درخواست میں مؤقف اختیار کیا گیا ہے کہ ایک ہی وقوعہ پر دو الگ مقدمات (سرور روڈ اور شادمان تھانہ) میں کارروائی قانون کے منافی ہے، جبکہ ہائیکورٹ اسی مقدمے میں دیگر ملزم کی سزا پہلے ہی معطل کر چکی ہے، لہٰذا وہ بھی مساوی ریلیف کے حقدار ہیں۔