پی ٹی آئی کا گورنر راج کیخلاف ہر آئینی و قانونی فورم پر جدوجہد کا فیصلہ

پاکستان تحریک انصاف (پی ٹی آئی) خیبر پختونخوا کی پارلیمانی پارٹی نے صوبے میں گورنر راج اور ایمرجنسی کے نفاذ کو غیر آئینی اور عوامی مینڈیٹ کے منافی قرار دیتے ہوئے اس کے خلاف تمام آئینی، قانونی، عدالتی اور سیاسی فورمز پر جدوجہد جاری رکھنے کا فیصلہ کیا ہے۔ اجلاس کے بعد جاری اعلامیے میں سیاسی انتقامی کارروائیوں، کارکنوں کی گرفتاریوں، 12 اضلاع میں ایمرجنسی اور قبائلی اضلاع کے انضمام کو رول بیک کرنے کی کوششوں کی شدید مذمت کی گئی۔ پارلیمانی پارٹی نے قبائلی مشران اور تمام سیاسی جماعتوں پر مشتمل مشترکہ جرگہ بلانے کا اعادہ کیا، جبکہ بانی پی ٹی آئی، ان کی اہلیہ اور بہنوں سمیت وزیراعلیٰ خیبر پختونخوا اور اسپیکر صوبائی اسمبلی کی فوری رہائی اور طبی سہولیات کا مطالبہ کیا۔ اجلاس میں بیرسٹر گوہر کی قیادت پر کامل اعتماد کا اظہار کرتے ہوئے واضح کیا گیا کہ پارٹی میں کوئی گروپ بندی نہیں اور تمام فیصلے بانی پی ٹی آئی کی ہدایت کے مطابق کیے جائیں گے۔