پی ٹی آئی نے سہیل آفریدی کی تبدیلی سے متعلق اجلاسوں میں شرکت پر پابندی لگا دی

پاکستان تحریک انصاف (پی ٹی آئی) نے خیبرپختونخوا کے وزیراعلیٰ کی تبدیلی کی افواہوں اور اندرونی چہ مہگوئیوں پر سخت نوٹس لیتے ہوئے پارٹی اراکین کو اس حوالے سے کسی بھی قسم کی میٹنگ یا اجلاس میں شرکت سے سختی سے روک دیا ہے، اور اس ضمن میں وزیراعلیٰ سہیل آفریدی سے متعلق ایک اہم اور واضح نوٹیفکیشن جاری کر دیا گیا ہے۔

پی ٹی آئی کی جانب سے جاری کردہ نوٹیفکیشن میں دوٹوک الفاظ میں واضح کیا گیا ہے کہ سہیل آفریدی ہی خیبرپختونخوا کے برحق وزیراعلیٰ ہیں اور بدستور اپنے منصب پر برقرار رہیں گے۔ پارٹی کے مطابق انہیں بانی چیئرمین کی مکمل حمایت اور بھرپور اعتماد حاصل ہے، اس لیے اس میں کسی بھی قسم کے ابہام کی کوئی گنجائش نہیں ہے۔

نوٹیفکیشن میں پارٹی کے تمام اراکین، عہدیداروں اور پارلیمنٹیرینز کو سخت ہدایات جاری کی گئی ہیں کہ وہ کسی بھی سطح پر وزیراعلیٰ کی تبدیلی سے متعلق نہ تو کوئی اجلاس بلائیں اور نہ ہی اس پر کوئی بحث یا گفتگو کی جائے۔ ہدایت نامے میں کہا گیا ہے کہ کوئی بھی رکن وزیراعلیٰ کی تبدیلی یا نئے نامزدگی کی کوئی تجویز پیش نہیں کرے گا کیونکہ بانی چیئرمین کے علاوہ کسی کو بھی کوئی متبادل امیدوار نامزد کرنے کا کوئی اختیار حاصل نہیں ہے۔ پی ٹی آئی کے متن میں اس عزم کا اعادہ کیا گیا ہے کہ اس اہم معاملے پر بانی چیئرمین کے فیصلے حتمی ہیں اور پارٹی کے تمام اراکین پر ان کی سختی سے پابندی کرنا لازم ہے۔