پی ٹی آئی رہنماؤں نے لانگ مارچ کی ناکامی کا ذمہ دار سہیل آفریدی کو قرار دیدیا: ذرائع

پاکستان تحریک انصاف (پی ٹی آئی) کی کور کمیٹی کے حالیہ اجلاس کی اندرونی تفصیلات سامنے آ گئی ہیں، جن کے مطابق اجلاس کے دوران پارٹی رہنماؤں نے اسلام آباد کی جانب لانگ مارچ کی ناکامی اور حکومت سے مذاکرات میں تعطل کا ذمہ دار مرکزی و صوبائی شخصیات کو قرار دیا ہے۔

پارٹی ذرائع کے مطابق اجلاس کے دوران پی ٹی آئی کے ایک سینئر مرکزی رہنما نے لانگ مارچ کی ناکامی کا تمام تر ملبہ سہیل آفریدی پر ڈالتے ہوئے کہا کہ انہوں نے مارچ کے منصوبے اور تیاریوں سے پارٹی کی مرکزی و صوبائی قیادت کو اندھیرے میں رکھا، جس کی وجہ سے کارکنان کی منظم نقل وحرکت نہ ہو سکی۔ علاوہ ازیں، کور کمیٹی کے بیشتر ارکان نے حکومت کے ساتھ سیاسی مذاکرات میں پیش رفت نہ ہونے کا ذمہ دار محمود خان اچکزئی کو ٹھہرایا۔

اجلاس کے دوران خیبر پختونخوا کے وزیرِ اعلیٰ کی سیاسی حکمتِ عملی پر بھی سوالات اٹھائے گئے۔ ایک رہنما کی جانب سے وزیرِ اعلیٰ کے مردان سے اچانک واپس سی ایم ہاؤس پشاور منتقل ہونے کی وجہ پوچھی گئی، جس پر بتایا گیا کہ مردان میں کارکنوں کی آمد اور تعداد توقع سے انتہائی کم ہونے کی بنا پر انہوں نے قیام منسوخ کیا۔ دوسری جانب اجلاس میں بیرسٹر سیف کی پارٹی سرگرمیوں میں واپسی کا معاملہ بھی زیرِ غور آیا اور ایک رکن نے انہیں دوبارہ فعال سیاسی کردار دینے کی تجویض دی۔

ذرائع کا کہنا ہے کہ آئندہ کے سیاسی لائحہ عمل، احتجاجی تحرک اور قیادت میں ہم آہنگی پیدا کرنے کے لیے تحریک انصاف نے کور کمیٹی کا ایک اور ہنگامی اجلاس طلب کر لیا ہے۔ واضح رہے کہ پی ٹی آئی کے ترجمان کی جانب سے کور کمیٹی کی ان اندرونی خبروں پر فی الحال باقاعدہ تصدیقی یا تردیدی ردِعمل سامنے نہیں آیا ہے۔