انٹرنیٹ ٹریفک میں آنے والے تعطل کی مسلسل نگرانی جاری ہے، پی ٹی اے

پاکستان ٹیلی کمیونیکیشن اتھارٹی (پی ٹی اے) نے کہا ہے کہ ایس ایم ڈبلیو 5 (SMW5) بین الاقوامی سب میرین کیبل سسٹم میں خرابی کے باعث ملک میں انٹرنیٹ سروسز میں آنے والے تعطل کی مسلسل نگرانی کی جا رہی ہے۔

پی ٹی اے کی جانب سے جاری کردہ بیان کے مطابق، بین الاقوامی سب میرین کیبل سسٹم میں خرابی کے نتیجے میں بعض انٹرنیٹ صارفین کو سروس کے معیار اور کنیکٹیویٹی میں وقتاً فوقتاً سست روی یا ڈیگریڈیشن کا سامنا ہو سکتا ہے۔

ترجمان پی ٹی اے نے بتایا کہ ٹرانس ورلڈ ایسوسی ایٹس (TWA) اس وقت ایس ایم ڈبلیو 5 کنسورشیم کے ساتھ مل کر خرابی کی بنیادی وجہ معلوم کرنے اور سروس کی مکمل بحالی کے متوقع وقت کے تعین کے لیے کام کر رہی ہے۔ اس دوران صارفین کو خدمات کی بلا تعطل فراہمی یقینی بنانے کے لیے انٹرنیٹ ٹریفک کو متبادل بین الاقوامی روابط (روٹس) پر منتقل کر دیا گیا ہے۔

بیان میں مزید کہا گیا ہے کہ پی ٹی اے تمام متعلقہ سٹیک ہولڈرز کے ساتھ مسلسل رابطے میں ہے اور صورتحال پر گہری نظر رکھے ہوئے ہے تاکہ ملک بھر میں انٹرنیٹ خدمات کی جلد سے جلد مکمل بحالی کو یقینی بنایا جا سکے۔