پی ٹی اے نے درآمدی موبائل فونز پر ٹیکس کم کرنے کی حمایت کردی

پاکستان ٹیلی کمیونیکیشن اتھارٹی (پی ٹی اے) کے ڈائریکٹر جنرل لائسنسنگ بریگیڈیئر (ر) عامر شہزاد نے کہا ہے کہ پی ٹی اے بیرون ملک سے لائے جانے والے موبائل فونز پر ٹیکس میں کمی کے حق میں ہے۔

اے آئی کانفرنس سے خطاب کرتے ہوئے ان کا کہنا تھا کہ موبائل فونز پر ٹیکس کا نفاذ یا وصولی پی ٹی اے کی ذمہ داری نہیں، یہ مکمل طور پر فیڈرل بورڈ آف ریونیو (ایف بی آر) کا اختیار ہے۔

ڈی جی لائسنسنگ نے کہا کہ پی ٹی اے بھی اسی طرح ان ٹیکسز سے متاثر ہوتا ہے جیسے عام شہری، اور ادارے کو اکثر اس حوالے سے غیر ضروری وضاحتیں دینا پڑتی ہیں۔

انہوں نے مزید واضح کیا کہ “ہمیں کسی قسم کے مفت موبائل فون یا خصوصی فری یونٹس فراہم نہیں کیے جاتے، ہم بھی عام صارفین کی طرح ٹیکس ادا کرتے ہیں۔”