پاکستان سٹاک ایکسچینج میں منفی رجحان، انڈیکس 1 لاکھ 69 ہزار تک گر گیا

کراچی: پاکستان سٹاک ایکسچینج (PSX) میں کاروباری ہفتے کے آخری روز اتار چڑھاؤ کے بعد منفی رجحان غالب رہا۔ ٹریڈنگ کے آغاز پر مارکیٹ میں مثبت رجحان دیکھا گیا، تاہم سرمایہ کاروں کی جانب سے پرافٹ ٹیکنگ کے باعث انڈیکس گراوٹ کا شکار ہو گیا۔

کاروبار کے دوران کے ایس ای (KSE) 100 انڈیکس 531 پوائنٹس کی کمی کے بعد 1 لاکھ 71 ہزار 818 کی سطح پر آگیا۔ مارکیٹ میں آج شدید اتار چڑھاؤ دیکھنے میں آیا جہاں انڈیکس ایک موقع پر 1 لاکھ 74 ہزار 148 کی بلند ترین سطح تک پہنچا، جبکہ گراوٹ کے دوران 1 لاکھ 69 ہزار 592 کی نچلی سطح کو بھی چھوا۔ یاد رہے کہ گزشتہ کاروباری روز مارکیٹ 1 لاکھ 72 ہزار 170 پوائنٹس پر بند ہوئی تھی۔

دوسری جانب کرنسی مارکیٹ میں استحکام دیکھا گیا۔ انٹر بینک میں امریکی ڈالر کی قدر میں 1 پیسے کی معمولی کمی ریکارڈ کی گئی، جس کے بعد ڈالر 279 روپے 56 پیسے کی سطح پر آگیا۔ معاشی ماہرین کا کہنا ہے کہ سٹاک مارکیٹ میں حالیہ مندی عارضی ہو سکتی ہے تاہم سرمایہ کار عالمی مالیاتی حالات اور مقامی پالیسیوں پر نظر رکھے ہوئے ہیں۔