سٹاک مارکیٹ میں تیزی، کاروبار کا مثبت آغاز

کراچی: پاکستان اسٹاک ایکسچینج میں کاروباری ہفتے کے چوتھے روز زبردست تیزی دیکھی گئی اور مارکیٹ کا آغاز مثبت زون میں ہوا۔

ٹریڈنگ کے دوران کے ایس ای 100 انڈیکس ایک ہزار سے زائد پوائنٹس کے اضافے کے ساتھ 1 لاکھ 51 ہزار 285 پوائنٹس کی سطح تک پہنچ گیا۔یاد رہے کہ گزشتہ روز کاروبار کے اختتام پر کے ایس ای 100 انڈیکس 837 پوائنٹس اضافے کے ساتھ 1 لاکھ 50 ہزار 16 پوائنٹس پر بند ہوا تھا۔دوسری جانب مشرقِ وسطیٰ کی کشیدگی کے باعث ایشیائی اسٹاک مارکیٹوں میں ملا جلا رجحان دیکھنے میں آیا۔جاپان کے نکی 225 میں تقریباً 3 فیصد اضافہ ریکارڈ کیا گیا، جبکہ ملائیشیا اور تھائی لینڈ کی مارکیٹوں میں بھی تیزی دیکھی گئی۔اس کے برعکس چین کے شنگھائی کمپوزٹ انڈیکس اور ہانگ کانگ کے ہانگ سینگ انڈیکس میں معمولی مندی ریکارڈ کی گئی۔

ماہرین کے مطابق عالمی اور علاقائی صورتحال کے باوجود مقامی مارکیٹ میں سرمایہ کاروں کا اعتماد برقرار ہے، جس کے باعث مارکیٹ مثبت سمت میں گامزن ہے۔