پی ایس ایل میں دو نئی ٹیموں کے نام فائنل ہونے کی خبریں بے بنیاد قرار، پی سی بی کی وضاحت سامنے آگئی

پاکستان کرکٹ بورڈ نے پاکستان سپر لیگ کی دو نئی ٹیموں کے ناموں سے متعلق پھیلنے والی خبروں کو مسترد کرتے ہوئے واضح کیا ہے کہ پی ایس ایل 11 میں شامل کی جانے والی نئی فرنچائزز کے شہروں کا حتمی فیصلہ ابھی تک نہیں کیا گیا۔
گزشتہ دنوں بعض میڈیا رپورٹس میں دعویٰ کیا گیا تھا کہ نئی ٹیموں کے لیے فیصل آباد اور گلگت کے ناموں پر اتفاق رائے ہونے کا امکان ہے، تاہم پی سی بی نے ان اطلاعات کو غیر مصدقہ اور قبل از وقت قرار دے دیا۔

ترجمان پی سی بی کے مطابق نئی فرنچائزز کے لیے 6 ممکنہ شہروں کی فہرست پہلے ہی جاری کی جا چکی ہے، اور بڈنگ میں کامیاب ہونے والے سرمایہ کاروں کو یہ اختیار حاصل ہوگا کہ وہ بولی دستاویزات میں شامل کسی بھی شہر کا نام اپنی ٹیم کے لیے منتخب کریں۔
کرکٹ بورڈ کے مطابق حتمی نام وہی ہوگا جس کا انتخاب کامیاب بولی دہندگان کریں گے، اس حوالے سے کوئی پیشگی فیصلہ نہیں کیا گیا۔

یاد رہے کہ پی سی بی نے جن چھ شہروں کو شارٹ لسٹ کیا ہے ان میں فیصل آباد، گلگت، سیالکوٹ، حیدرآباد، راولپنڈی اور مظفرآباد شامل ہیں۔
نئی ٹیموں کے لیے دنیا بھر سے درخواستیں مانگی گئی ہیں جبکہ ٹیکنیکل پروپوزلز جمع کرانے کی آخری تاریخ 15 دسمبر مقرر کی گئی ہے۔