لاہور: پی ایس ایل چیف ایگزیکٹو اور امریکی قونصل جنرل کی ملاقات،امریکہ میں کرکٹ کی ترقی پر بات چیت

لاہور میں امریکی قونصل جنرل سٹیٹسن سینڈرز سے پاکستان سپر لیگ (پی ایس ایل) کے چیف ایگزیکٹو سلمان نصیر نے ملاقات کی۔ ملاقات میں نیو یارک میں ہونے والے پی ایس ایل روڈ شو کے حوالے سے تفصیلی گفتگو کی گئی اور امریکی سرمایہ کاروں کی لیگ میں دلچسپی پر بھی بات چیت ہوئی۔

قونصل جنرل سینڈرز اور سلمان نصیر نے امریکہ میں کرکٹ کی بڑھتی دلچسپی کے لیے مختلف پلانز پر غور کیا۔ امریکی قونصل جنرل نے پی ایس ایل کی ورکنگ اور اس کی بڑھتی مقبولیت کے بارے میں جاننے میں دلچسپی ظاہر کی۔

ملاقات میں امریکہ میں کرکٹ کے فروغ کے لیے نئے راستے تلاش کرنے پر بھی اتفاق کیا گیا تاکہ لیگ کی بین الاقوامی پہچان اور سرمایہ کاری کے مواقع مزید بڑھائے جا سکیں۔