پی آئی اے کی نجکاری کا عمل آخری مرحلے میں داخل

پاکستان انٹرنیشنل ایئر لائنز (پی آئی اے) کی نجکاری کا عمل اختتامی مرحلے میں داخل ہو گیا ہے۔ نجکاری کمیشن کے مطابق نیلامی کے لیے بولیاں کل لگیں گی جبکہ تمام انتظامات مکمل کر لیے گئے ہیں۔ پی آئی اے کی خریداری کے لیے تین کنسورشیم بولی کے عمل میں حصہ لیں گے۔

کنسورشیم ون میں لکی سیمنٹ، حب پاور، کوہاٹ سیمنٹ اور میٹرو وینچرز شامل ہیں، کنسورشیم ٹو میں عارف حبیب، فاطمہ فرٹیلائزر، سٹی اسکولز اور لیک سٹی ہولڈنگز شامل ہیں جبکہ کنسورشیم تھری میں ایئر بلیو پرائیویٹ لمیٹڈ شریک ہے۔ حکام کے مطابق فوجی فرٹیلائزرز پر مشتمل چوتھا کنسورشیم نیلامی کے عمل سے دستبردار ہو چکا ہے۔

بولیاں جمع کرانے کا وقت صبح 10:45 سے 11:15 تک ہوگا جبکہ بولیاں سہ پہر 3:30 بجے کھولی جائیں گی۔ حکومتی فیصلے کے تحت نیلامی کا مرحلہ ٹی وی نیٹ ورکس پر براہِ راست دکھایا جائے گا۔ بولیاں ایک شفاف باکس میں رکھی جائیں گی۔

کمیشن حکام کے مطابق اگر بولیاں ریفرنس قیمت سے زیادہ ہوئیں تو کھلی نیلامی ہوگی، جبکہ کم بولی کی صورت میں زیادہ بولی لگانے والے کو ترجیح دی جائے گی۔ کامیاب بولی کی صورت میں وفاقی کابینہ چند دنوں میں منظوری دے گی، جس کے بعد دستاویزات پر دستخط کا مرحلہ مکمل کیا جائے گا۔

طے شدہ طریقہ کار کے تحت نیلامی پی آئی اے کے 75 فیصد حصص کی بنیاد پر ہوگی، جن کی فروخت سے حاصل ہونے والی رقم کا 92.5 فیصد پی آئی اے کو جبکہ 7.5 فیصد قومی خزانے میں جائے گا۔ ابتدائی طور پر حکومت کے پاس 25 فیصد حصص برقرار رہیں گے، تاہم کامیاب بولی دہندہ ادائیگی کے بعد باقی حصص خریدنے کا اختیار رکھے گا۔