سابق برطانوی شہزادہ اینڈریو ماؤنٹ بیٹن ونزر کو رہا کردیا گیا

برطانیہ کے بادشاہ چارلس کے بھائی اور سابق برطانوی شہزادے اینڈریو ماؤنٹ بیٹن ونزر کو حراست کے بعد رہا کر دیا گیا۔ برطانوی ذرائع ابلاغ کے مطابق انہیں کار کی پچھلی نشست پر تھانے سے نکلتے دیکھا گیا۔

رپورٹس کے مطابق اینڈریو کو کمسنوں سے جنسی تعلق کے مجرم جیفری ایپسٹین کو خفیہ سرکاری دستاویز فراہم کرنے کے شبہے میں گرفتار کیا گیا تھا۔

استغاثہ حکام کے مطابق اس نوعیت کے جرم کی زیادہ سے زیادہ سزا عمر قید ہو سکتی ہے، تاہم اینڈریو کے معاملے میں عمر قید کا امکان کم بتایا جا رہا ہے۔ ذرائع کے مطابق سابق شہزادے کو قانونی کارروائی یا جیل سے متعلق کسی قسم کا استثنیٰ حاصل نہیں ہے۔

مزید بتایا گیا ہے کہ گرفتاری سے قبل بادشاہ یا شاہی محل کو آگاہ نہیں کیا گیا تھا۔ اینڈریو حالیہ عرصے میں گرفتار ہونے والے برطانیہ کے پہلے شاہی فرد ہیں۔