وزیراعظم کی رحیم یارخان میں صدر یواے ای سے ملاقات، باہمی اُمور پر تبادلہ خیال

رحیم یار خان: وزیراعظم شہباز شریف رحیم یار خان پہنچ گئے جہاں انہوں نے متحدہ عرب امارات کے صدر شیخ محمد بن زاید النہیان سے ملاقات کی۔ وزیراعظم سیکرٹریٹ کے مطابق ملاقات شیخ زید پیلس میں خوشگوار اور دوستانہ ماحول میں ہوئی۔

اعلامیے کے مطابق ملاقات میں نائب وزیراعظم و وزیر خارجہ اسحاق ڈار، وزیر اطلاعات عطا اللہ تارڑ، طارق فاطمی اور دیگر اعلیٰ حکام بھی موجود تھے۔ دونوں رہنماؤں نے 26 دسمبر کو اسلام آباد میں ہونے والی ملاقات میں طے پانے والے امور کو آگے بڑھایا۔

دورانِ گفتگو وزیراعظم شہباز شریف نے پاکستان اور متحدہ عرب امارات کے درمیان دوطرفہ تجارت میں نمایاں اضافے کی ضرورت پر زور دیا۔ دونوں رہنماؤں نے آئی ٹی، توانائی، کان کنی و معدنیات اور دفاعی تعاون سمیت مختلف شعبوں میں باہمی تعاون پر بھی تبادلہ خیال کیا۔

وزیراعظم نے متحدہ عرب امارات کی شاندار ترقی کو سراہتے ہوئے یو اے ای میں مقیم 21 لاکھ پاکستانیوں کی میزبانی پر اماراتی قیادت کا شکریہ ادا کیا اور کہا کہ بیرونِ ملک مقیم پاکستانی دونوں ممالک کے درمیان تعلقات کو مضبوط بنانے میں اہم کردار ادا کر رہے ہیں۔