وزیراعظم شہباز شریف اور اقوام متحدہ کے سیکرٹری جنرل انتونیو گوتریس کی ملاقات، علاقائی و عالمی امور پر تفصیلی تبادلہ خیال

وزیراعظم محمد شہباز شریف سے پاکستان کے دورے پر آئے ہوئے اقوام متحدہ کے سیکرٹری جنرل انتونیو گوتریس نے وزیراعظم ہاؤس میں اہم ملاقات کی۔ وزیراعظم نے سیکرٹری جنرل کے اصولی عزم اور عالمی امن کے لیے ان کی خدمات کو سراہتے ہوئے کثیرالجہتی نظام اور اقوام متحدہ میں ترقی پذیر ممالک کی ترجیحات کے مطابق اصلاحات کی ضرورت پر زور دیا۔ ملاقات کے دوران وزیراعظم نے واضح کیا کہ سندھ طاس معاہدے کو یکطرفہ طور پر التوا میں رکھنے کا بھارت کا فیصلہ کسی قانونی بنیاد کا حامل نہیں ہے، جبکہ جموں و کشمیر کے تنازع کا اقوام متحدہ کی قراردادوں کے مطابق حل ناگزیر ہے۔ وزیراعظم نے افغانستان سے ہونے والی دہشتگردی پر شدید تشویش کا اظہار کرتے ہوئے افغان سرزمین پر موجود گروہوں کے خلاف ٹھوس اقدامات کا مطالبہ کیا۔ اس کے علاوہ، فلسطین کے معاملے پر غزہ امن منصوبے اور اقوام متحدہ کی قراردادوں پر عملدرآمد پر زور دیا گیا، جبکہ سیکرٹری جنرل نے امن مشنز اور عالمی امن کے لیے پاکستان کی دیرینہ خدمات کا اعتراف کیا۔ ملاقات کے بعد وزیراعظم نے معزز مہمان اور ان کے وفد کے اعزاز میں عشائیہ بھی دیا۔