وزیرِ اعظم کا اتحادی سینیٹرز کو عشائیہ،27ویں آئینی ترمیم کی منظوری میں تعاون پر شکریہ

وزیرِ اعظم محمد شہباز شریف کی جانب سے حکومتی اور اتحادی جماعتوں کے سینیٹرز کے اعزاز میں خصوصی عشائیے کا اہتمام کیا گیا، جس میں وزیرِ اعظم نے تمام سینیٹرز کا پرتپاک استقبال کیا اور 27ویں آئینی ترمیم کی منظوری کے عمل میں بھرپور تعاون پر شکریہ ادا کیا۔
وزیرِ اعظم نے کہا کہ وہ صدرِ مملکت آصف علی زرداری اور تمام اتحادی جماعتوں کے سربراہان کے مشکور ہیں جنہوں نے قومی سوچ کے تحت قومی مفاد میں اہم کردار ادا کیا۔ انہوں نے کہا کہ وفاق کی مضبوطی، صوبوں کے درمیان ہم آہنگی، اچھی گورننس اور ملک کے وسیع تر مفاد کے لیے 27ویں آئینی ترمیم پر تمام اتحادیوں نے مل کر کوشش کی، جو قابلِ تحسین ہے۔
وزیرِ اعظم نے مزید کہا کہ موجودہ حکومت کے دوران حاصل کیے گئے تمام سنگ میل، حکومت اور اتحادی جماعتوں کے باہمی تعاون اور ہم آہنگی کا نتیجہ ہیں۔ پاکستان کی سفارتی کامیابیاں بھی اسی اتحاد، نظم اور مضبوط باہمی رابطے کی عکاسی کرتی ہیں۔
وزیرِ اعظم شہباز شریف نے کہا کہ مشترکہ کاوشوں کی بدولت پاکستان کو عالمی سطح پر عزت اور مقام حاصل ہوا ہے۔ انہوں نے بتایا کہ ملکی معاشی صورتحال میں مسلسل بہتری آرہی ہے اور اللہ کے فضل و کرم سے سیاسی و معاشی استحکام نے ملک کی سمت درست کر دی ہے۔
انہوں نے اس عزم کا اظہار کیا کہ ترقی، خوشحالی اور قومی استحکام کے لیے تمام جماعتوں اور اداروں کو مل کر کام کرنا ہوگا تاکہ پاکستان کا مستقبل مضبوط اور روشن ہو۔