خیبرپختونخوا میں ایمرجنسی کی توثیق کیلئے پارلیمنٹ کا مشترکہ اجلاس آج ہوگا

صدرِ مملکت آصف علی زرداری نے آئینِ پاکستان کے آرٹیکل 54 کے تحت پارلیمنٹ کا مشترکہ اجلاس آج دن 11 بجے طلب کر لیا ہے، جس کا بنیادی ایجنڈا خیبر پختونخوا میں نافذ کیے گئے گورنر راج کی آئینی توثیق حاصل کرنا ہے۔

اس سے قبل قومی اسمبلی اور سینیٹ کے جداگانہ اجلاسوں میں خیبرپختونخوا میں ایمرجنسی کے نفاذ کی توثیق کی جا چکی ہے، جبکہ اپوزیشن جماعتوں نے اس فیصلے کی شدید مخالفت کرتے ہوئے ایوان کی کارروائی کا بائیکاٹ کیا۔ آئینی تقاضوں کو پورا کرنے کے لیے اب پارلیمنٹ کے مشترکہ اجلاس سے اس فیصلے کی حتمی منظوری لی جائے گی۔

دوسری جانب سیاسی کشیدگی کم کرنے کی کوششوں کے تحت قومی اسمبلی کے اسپیکر سردار ایاز صادق نے اپوزیشن جماعت پاکستان تحریکِ انصاف (پی ٹی آئی) کو ایک بار پھر باضابطہ مذاکرات کی پیشکش کی ہے۔ علاوہ ازیں، اسپیکر قومی اسمبلی نے پی ٹی آئی کے گرفتار ارکانِ اسمبلی ثناء اللہ مستی خیل اور داوڑ کنڈی کے پروڈکشن آرڈرز بھی جاری کر دیے ہیں تاکہ وہ ایوان کی کارروائی میں حصہ لے سکیں۔