صدر، وزیراعظم کی عید میلادالنبیﷺ پر قوم کو مبارکباد، وطن میں امن کیلئے دعائیں

صدرِ مملکت آصف علی زرداری اور وزیراعظم محمد شہباز شریف نے جشن عید میلاد النبیﷺ کے بابرکت موقع پر ملک و ملتِ اسلامیہ کو دلی مبارکباد پیش کرتے ہوئے وطنِ عزیز کے امن، استحکام اور خوشحالی کے لیے خصوصی دعائیں کی ہیں۔ اپنے پیغام میں صدرِ مملکت آصف علی زرداری نے کہا کہ بحیثیت امتِ محمدیﷺ ہم پر لازم ہے کہ معاشرے میں عدل و انصاف، برداشت، بین المسالک و بین المذاہب ہم آہنگی اور انسانی وقار کے تحفظ کا عملی مظاہرہ کریں۔ وزیراعظم شہباز شریف نے اپنے پیغام میں کہا کہ اسوۂ حسنہﷺ تمام مسلمانوں کی دینی و دنیاوی کامرانی کے لیے مشعلِ راہ ہے اور رسول اکرمﷺ کی ذاتِ مبارک اسلام کی تعلیمات کا بہترین نمونہ ہے۔ انہوں نے قوم پر زور دیا کہ سیرتِ طیبہ کو اپنے انفرادی و اجتماعی رویوں میں شامل کر کے پاکستان کو ایک مضبوط اور فلاحی ریاست بنانے کے لیے اپنا کردار ادا کریں۔