صدر مملکت نے قومی اسمبلی کا بجٹ اور سینیٹ اجلاس بلانے کی منظوری دیدی

اسلام آباد: صدرِ مملکت آصف علی زرداری نے قومی اسمبلی اور سینیٹ کے اہم ترین اجلاس 5 جون (بروز جمعہ) کو طلب کرنے کی منظوری دے دی ہے، جس میں آئندہ مالی سال کا وفاقی بجٹ پیش کیا جائے گا۔

صدرِ مملکت کی منظوری کے بعد قومی اسمبلی کا بجٹ اجلاس 5 جون کو شام 5 بجے جبکہ سینیٹ کا اجلاس اسی روز شام 6 بجے پارلیمنٹ ہاؤس میں ہوگا۔ اس اہم ترین اجلاس میں حکومت کی جانب سے آئندہ مالی سال 27-2026 کا وفاقی بجٹ پیش کیا جائے گا، جس میں ملک کی اقتصادی پالیسیوں اور مالیاتی اہداف کا تعین کیا جائے گا۔پارلیمانی ذرائع کے مطابق آئندہ چند دنوں میں قومی اسمبلی اور سینیٹ کے ان اجلاسوں کا باقاعدہ ایجنڈا بھی جاری کر دیا جائے گا۔

واضح رہے کہ رواں سال پاکستان سے 60 سے زائد اراکینِ پارلیمنٹ فریضۂ حج کی ادائیگی کے لیے سعودی عرب گئے ہوئے ہیں۔ ان تمام اراکینِ پارلیمنٹ کی جون کے پہلے ہفتے کے اوائل میں وطن واپسی متوقع ہے، جس کے بعد وہ بجٹ کی منظوری کے اس اہم پارلیمانی عمل میں بھرپور حصہ لے سکیں گے۔