افغانستان کی غیر قانونی حکومت نے سرخ لکیر عبور کر لی: آصف علی زرداری

اسلام آباد: صدرِ مملکت آصف علی زرداری نے پاکستانی شہری علاقوں کو نشانہ بنانے والے ڈرون حملوں کی سخت مذمت کرتے ہوئے کہا ہے کہ افغانستان کی غیر قانونی حکومت مسلسل اپنی ذمہ داریوں سے مکر رہی ہے۔

افغانستان نے دہشت گرد گروہوں کو محفوظ پناہ گاہیں فراہم نہ کرنے کا وعدہ کیا تھا، مگر اب وہ پاکستان سمیت اسلامی دنیا کی بڑی عسکری طاقت کو اشتعال دلانے کی جسارت کر رہا ہے۔افغان حکومت بیک وقت پاکستان کے دوست ممالک کے ساتھ مذاکرات کی خواہش ظاہر کر رہی ہے، لیکن شہریوں کو نشانہ بنانے کی کوشش ایک سرخ لکیر عبور کرنے کے مترادف ہے۔پاکستان خلیج کے خطے اور مغربی ایشیا میں امن و استحکام کے فروغ کے لیے مسلسل کوششیں کر رہا ہے، تاہم طالبان حکومت کے اقدام نے سنگین نتائج کو جنم دیا ہے۔صدر زرداری نے ڈرون حملوں سے زخمی ہونے والے بچوں اور دیگر شہریوں کی جلد صحت یابی کی نیک خواہشات کا اظہار کیا اور کہا کہ پاکستان کی مسلح افواج اور سکیورٹی ادارے ملک اور عوام کے تحفظ کے لیے مکمل طور پر پُرعزم ہیں۔