صدر آصف علی زرداری کا شہید بینظیر بھٹو کی 18ویں برسی پر پیغام

صدرِ مملکت آصف علی زرداری نے شہیدِ جمہوریت محترمہ بینظیر بھٹو کی اٹھارویں برسی پر انہیں خراجِ عقیدت پیش کرتے ہوئے کہا ہے کہ شہید بینظیر بھٹو نے پاکستان میں جمہوریت، آئین، پارلیمان اور عوام کے ووٹ کے حق کے لیے لازوال قربانیاں دیں۔ صدر زرداری نے کہا کہ شہید بینظیر بھٹو عالمِ اسلام کی پہلی منتخب خاتون وزیرِاعظم تھیں، جن کی سیاست کا مرکز غریب، کسان اور مزدور رہے۔
انہوں نے کہا کہ نوجوانوں کی تعلیم، روزگار اور فلاح، اقلیتوں کے حقوق کا تحفظ، فرقہ واریت و انتہاپسندی کے خلاف جدوجہد اور اتحاد و مفاہمت کا پیغام شہید بینظیر بھٹو کے وژن کا اہم حصہ تھا۔ صدرِ مملکت کے مطابق “جمہوریت بہترین انتقام ہے” کا پیغام تاریخ میں ہمیشہ یاد رکھا جائے گا، اور قوم ایک جمہوری و مضبوط پاکستان کے عزم کی تجدید کرتی ہے۔