مسلم لیگ ن کے رکن قومی اسمبلی ملک محمد اقبال چنڑ انتقال کرگئے

پاکستان مسلم لیگ (ن) کے سینئر رہنما اور بہاولپور سے رکنِ قومی اسمبلی (NA-168) ملک محمد اقبال چنڑ برین ہیمریج کے باعث انتقال کر گئے ہیں۔ خاندانی ذرائع کے مطابق وہ گزشتہ چند ہفتوں سے شدید علیل تھے اور ان کا برین ہیمریج کے باعث آپریشن بھی کیا گیا تھا، تاہم وہ جانبر نہ ہو سکے۔ مرحوم ملک محمد اقبال چنڑ پنجاب اسمبلی کے موجودہ ڈپٹی اسپیکر ملک ظہیر اقبال چنڑ کے والد تھے اور طویل عرصے سے مسلم لیگ (ن) کی فعال سیاست کا حصہ رہے۔ وہ ماضی میں پنجاب اسمبلی کے رکن اور صوبائی وزیر بھی رہ چکے ہیں۔