کاروباری برادری کو ہر ممکن سہولت فراہم کرنے کیلئے پرعزم ہیں: وزیراعظم

وزیراعظم محمد شہباز شریف کی زیرِ صدارت ٹریڈ فیسیلیٹیشن بورڈ کا پہلا اعلیٰ سطحی اجلاس اسلام آباد میں منعقد ہوا، جس میں وزیراعظم نے کاروباری برادری کی سہولت اور ملکی برآمدات میں اضافے کے لیے اہم فیصلوں کی منظوری دی۔ اس موقع پر گفتگو کرتے ہوئے وزیراعظم نے کہا کہ حکومت تاجر برادری کو سہولیات کی فراہمی اور تجارتی عمل کو آسان بنانے کے لیے پرعزم ہے تاکہ پاکستان کو عالمی سپلائی چینز کا مؤثر حصہ بنایا جا سکے۔ انہوں نے تجارتی طریقہ کار میں حائل تاخیر کے خاتمے، کاروباری لاگت میں کمی اور قومی بندرگاہوں پر تمام متعلقہ اداروں کو ‘ون ونڈو’ سہولیات فراہم کرنے کی ہدایت کی۔

اجلاس کے دوران وزیراعظم نے تجارتی عمل کو تیز کرنے کے لیے مصنوعی ذہانت (AI) کا استعمال بڑھانے، نان ٹیرف اقدامات کے جامع آڈٹ اور پاکستانی بندرگاہوں تک براہِ راست شپنگ لائنز لانے کی بھی ہدایت کی۔ اس کے علاوہ قومی تجارتی کارکردگی انڈیکس بنانے اور چھوٹے و درمیانے درجے کے کاروباری اداروں (SMEs) کو خصوصی ریلیف دینے کا حکم دیا گیا۔ وزیراعظم نے تمام بندرگاہوں کے لیے ‘ٹائم ریلیز آٹومیٹڈ سسٹم’ کے اہداف منظور کیے، جس کے تحت رواں مالی سال کے اختتام تک پری ارائیول کلیئرنس 30 فیصد، گرین چینل کا حصہ 65 فیصد تک بڑھانا اور مجاز اقتصادی آپریٹرز (AEOs) کی تعداد 50 سے زائد کرنا شامل ہے۔ نیز نان ٹیرف اقدامات کے جائزے کے لیے قائم ورکنگ گروپ کو ایک ماہ کے اندر روڈ میپ پیش کرنے کی ہدایت کی گئی۔