وزیراعظم شہباز شریف کا امیر قطر سے رابطہ، حملوں کے تناظر میں عوام کیساتھ مکمل یکجہتی کا اظہار

وزیراعظم شہباز شریف نے قطر کے امیر شیخ تمیم بن حمد آل ثانی سے ٹیلی فون پر رابطہ کیا ہے، جس کے دوران خطے میں حالیہ کشیدگی پر گہری تشویش کا اظہار کیا گیا۔ وزیراعظم نے حالیہ حملوں کے تناظر میں قطری عوام کے ساتھ پاکستان کی جانب سے مکمل یکجہتی کا اعادہ کیا اور زور دیا کہ تمام فریقین تحمل کا مظاہرہ کریں اور امن و استحکام کو نقصان پہنچانے والے اقدامات سے ہر ممکن گریز کریں۔ شہباز شریف نے خطے میں امن کی کوششوں کے لیے مستقل اور غیر متزلزل حمایت پر امیرِ قطر کا شکریہ ادا کیا۔ اس موقع پر امیرِ قطر نے وزیراعظم، نائب وزیراعظم اور فیلڈ مارشل کے امنِ عالم کے قیام کے لیے قائدانہ کردار کو سراہا اور اس سلسلے میں قطر کی جانب سے مسلسل حمایت جاری رکھنے کی یقین دہانی کرائی۔ دونوں رہنماؤں نے خطے میں پائیدار امن کے لیے سفارتی روابط اور بامعنی مذاکرات کا سلسلہ جاری رکھنے پر اتفاق کرتے ہوئے اس بات پر زور دیا کہ تمام فریقین کی جانب سے کیے گئے وعدوں پر مکمل عملدرآمد کو یقینی بنانا ناگزیر ہے۔