ملک بھر میں کھیلوں کے فروغ کیلئے ٹیلنٹ کو بلاامتیاز مواقع دیں گے: وزیراعظم

وزیراعظم شہباز شریف نے عزم کا اظہار کیا ہے کہ حکومت ملک بھر میں کھیلوں کی بحالی اور ترقی کے لیے تمام تر وسائل فراہم کرے گی اور ہر علاقے کے ابھرتے ہوئے ٹیلنٹ کو بلاامتیاز یکساں مواقع دیئے جائیں گے۔

اسلام آباد میں سپورٹس انیشی ایٹو اور جدید سہولیات کے حوالے سے منعقدہ ایک اعلیٰ سطحی اجلاس کی صدارت کرتے ہوئے وزیراعظم نے کہا کہ پاکستان میں بے پناہ نوجوان صلاحیتیں موجود ہیں، لیکن مناسب سرپرستی اور مواقع نہ ملنے کی وجہ سے کثیر تعداد میں ٹیلنٹ ضائع ہو جاتا ہے۔ انہوں نے ہدایت کی کہ دیہی اور دور دراز علاقوں، بالخصوص بلوچستان، خیبر پختونخوا اور گلگت بلتستان کے کھلاڑیوں کو قومی اور بین الاقوامی دھارے میں لانے کے لیے شفاف اور میرٹ پر مبنی نظام وضع کیا جائے۔

وزیراعظم نے مزید کہا کہ کھیل نہ صرف نوجوانوں میں نظم و ضبط اور مثبت سوچ پیدا کرتے ہیں بلکہ عالمی سطح پر ملک کا سرفخر سے بلند کرنے کا ذریعہ بھی ہیں۔ انہوں نے کھیلوں کی فیڈریشنز کو ہدایت کی کہ وہ سیاسی مداخلت سے پاک ہو کر کام کریں اور نئے ٹیلنٹ کو تلاش کر کے انہیں جدید ترین تربیت فراہم کریں۔