وزیراعظم ایمرجنسی کے بعد منگل کو پشاور کا پہلا دورہ کریں گے، اہم اجلاس متوقع

وزیراعظم شہباز شریف ایمرجنسی کے نفاذ کے بعد منگل کو اپنے پہلے دورۂ پشاور پر پہنچیں گے، جہاں وہ خیبر پختونخوا کی امن و امان، امن و استحکام، ترقیاتی امور اور مجموعی سیاسی صورتحال سے متعلق اعلیٰ سطح کے اجلاس کی صدارت کریں گے۔

حکومتی ذرائع کے مطابق پشاور میں قائم گورنر ہاؤس میں منعقد ہونے والے اس اہم اجلاس کے دوران وزیراعظم کو خیبر پختونخوا کے انتظامی امور، امن و امان کی مجموعی صورتحال اور صوبے میں جاری و مجوزہ ترقیاتی منصوبوں پر تفصیلی بریفنگ دی جائے گی۔ اجلاس میں صوبے میں پائیدار امن کے قیام اور دہشت گردی کے مکمل خاتمے کے لیے اٹھائے جانے والے سیکیورٹی اقدامات کا بھی جائزہ لیا جائے گا۔

ذرائع کا بتانا ہے کہ وزیراعظم شہباز شریف کے اس اہم دورۂ پشاور میں نائب وزیراعظم و وزیرِ خارجہ سینیٹر اسحاق ڈار اور وفاقی وزیرِ داخلہ محسن نقوی بھی ان کے ہمراہ ہوں گے۔ دورے کے دوران وفاقی قیادت صوبے کو درپیش چیلنجز پر تبادلہ خیال کرے گی اور اہم فیصلے متوقع ہیں۔