خلیج کا بحران نہ پیدا ہوتا تو پاکستان دیگر ابھرتی ہوئی معیشتوں کی طرح بہت آگے جا چکا ہوتا: وزیر اعظم

وزیراعظم شہباز شریف نے برطانیہ کے دارالحکومت لندن میں ‘لندن اسٹاک ایکسچینج’ کا تاریخی دورہ کیا، جہاں انہوں نے مارکیٹ کی روایت کے مطابق ٹریڈنگ اوپننگ کی تقریب میں شرکت کی اور پاکستان کے 3 ارب ڈالرز کے یورو بانڈز کی لسٹنگ کی باضابطہ رونمائی کی۔ اس موقع پر لندن اسٹاک ایکسچینج کے چیف ایگزیکٹیو آفیسر اور سینئر حکام نے وزیراعظم کا گرمجوش استقبال کیا۔ واضح رہے کہ شہباز شریف پاکستان کے پہلے وزیراعظم ہیں جنہیں لندن اسٹاک ایکسچینج کی مارکیٹ اوپننگ سرمن میں شرکت اور اسے باقاعدہ شروع کرنے کا تاریخی اعزاز حاصل ہوا ہے۔

تقریب سے خطاب کرتے ہوئے وزیراعظم شہباز شریف نے کہا کہ پاکستان نے حالیہ برسوں میں ملکی معیشت کو مستحکم بنانے کے لیے بے پناہ محنت کی ہے جس کے نتیجے میں میکرو اکنامک اشاریے مسلسل بہتری کی جانب گامزن ہیں۔ انہوں نے کہا کہ اگر خلیج میں بحران اور کشیدگی کے حالات پیدا نہ ہوتے تو پاکستان دیگر ابھرتی ہوئی معیشتوں کی طرح معاشی ترقی کی دوڑ میں بہت آگے جا چکا ہوتا۔ وزیراعظم نے تاکید کی کہ پاکستان خطے میں امن اور معاشی استحکام کے لیے اپنی تمام تر سفارتی کوششیں جاری رکھے ہوئے ہے۔ وزیراعظم دفتر کے جاری کردہ اعلامیے کے مطابق یہ دورہ پاکستان اور عالمی مالیاتی اداروں کے درمیان گہرے روابط کا مظہر ہے۔ دورے کے دوران متعدد بین الاقوامی مالیاتی اداروں کے سینیئر حکام سے اہم ملاقاتوں کے بعد وزیراعظم وطن واپس روانہ ہو گئے۔