بھارت نے سندھ طاس معاہدہ معطل کیا، پانی کو ہتھیار بنانے کی دھمکی دی: وزیر اعظم

اسلام آباد: وزیرِ اعظم شہباز شریف نے کہا ہے کہ ہمسایہ ملک کی جانب سے سندھ طاس معاہدے کی خلاف ورزی جاری ہے اور پانی کو بطور ہتھیار استعمال کرنے کی دھمکی دی گئی ہے۔

پاکستان اور اقوام متحدہ کے مختلف اداروں کے مابین تعاون کے معاہدوں پر دستخط کی تقریب سے خطاب کرتے ہوئے وزیراعظم نے کہا کہ دنیا کو اس وقت جغرافیائی کشیدگی اور موسمیاتی دباؤ جیسے بڑے چیلنجز درپیش ہیں اور پائیدار ترقی ہی عالمی امن کی ضمانت دے سکتی ہے۔

انہوں نے کہا کہ پاکستان کا عالمی کاربن اخراج میں حصہ ایک فیصد سے بھی کم ہے، اس کے باوجود پاکستان موسمیاتی تبدیلی سے سب سے زیادہ متاثر ہونے والے ممالک میں شامل ہے۔ 2022 کے تباہ کن سیلاب کے نقصانات آج بھی قوم کے ذہنوں میں تازہ ہیں۔ وزیراعظم نے کہا کہ پاکستان کی نوجوان آبادی ملک کا سب سے بڑا اثاثہ اور ترقی کا اہم موقع ہے۔

وزیراعظم نے اقوام متحدہ پر زور دیا کہ اسے کثیر قطبی دنیا کے تقاضوں کے مطابق مزید مضبوط اور فعال بنایا جائے۔ انہوں نے کہا کہ جدید ٹیکنالوجی اور مصنوعی ذہانت کے فوائد پوری انسانیت تک پہنچنے چاہئیں، نہ کہ صرف مخصوص طبقات تک محدود رہیں۔

تقریب میں جن معاہدوں پر دستخط کیے گئے ان میں یونیڈو (UNIDO) پروگرام برائے کنٹری پارٹنرشپ پاکستان 2025 تا 2030، یو این او ڈی سی (UNODC) کنٹری پروگرام پاکستان، اور انسٹیٹیوٹ آف نیوکلیئر میڈیسن اینڈ آنکالوجی لاہور (INMOL) اور IAEA کے درمیان تعاون کے معاہدے شامل ہیں۔