خیبر پختونخوا میں ایمرجنسی کا ملکی مفاد میں فیصلہ کیا، اچھے نتائج نکلیں گے: وزیراعظم

وزیراعظم شہباز شریف نے گوجرانوالہ میں ذرائع ابلاغ سے گفتگو کرتے ہوئے کہا ہے کہ خیبر پختونخوا میں ایمرجنسی کا نفاذ ایک مجبوری تھا، جو پاکستان کے بہترین مفاد میں کیا گیا ہے اور اس کے جلد اچھے اور مثبت نتائج سامنے آئیں گے۔

مرحوم بشیر محمود ورک کی رہائش گاہ پر ان کی خدمات کو خراجِ عقیدت پیش کرنے کے بعد صحافیوں سے بات کرتے ہوئے وزیراعظم نے کہا کہ وفاقی حکومت نے خیبر پختونخوا کی ترقی اور امن و امان کے لیے ہمیشہ صوبائی حکومت کو کامل تعاون کی پیشکش کی۔ تاہم تعاون کے بدلے وفاق کو مسلسل لانگ مارچ، دھرنوں اور دھمکیوں کا سامنا کرنا پڑا۔ وزیراعظم کا کہنا تھا کہ گزشتہ سال کی طرح اس بار بھی ملک کا نظام مفلوج کرنے اور مکمل خون ریزی کا منصوبہ بنایا گیا تھا جسے ناکام بنانا ریاستی مفاد میں ضروری تھا۔

شہباز شریف نے انکشاف کیا کہ حکومت اور اپوزیشن کی مذاکراتی کمیٹیوں نے رات بھر بیٹھ کر مسودے پر پیش رفت کی اور لانگ مارچ کی کال واپس لینے پر اتفاق ہوا تھا، لیکن آخری وقت میں مخالف فریق نے تیار کردہ مسودے کو منظور کرنے سے صاف انکار کر دیا۔ انہوں نے افسوس کا اظہار کرتے ہوئے کہا کہ سیاسی محاذ آرائی اور عدم تعاون کی وجہ سے ملک کو نقصان پہنچانے کی کوشش کی گئی، اسی لیے حکومت کو باالآخر آئینی و قانونی اقدام اٹھانا پڑا۔