شہباز شریف کا انڈونیشن صدر سے ٹیلیفونک رابطہ، سکیورٹی صورتحال پر اظہار تشویش

اسلام آباد: وزیر اعظم شہباز شریف کا انڈونیشیا کے صدر پرابوو سوبیانتو سے ٹیلیفونک رابطہ ہوا جس میں دونوں رہنماؤں نے مشرق وسطیٰ میں بڑھتے ہوئے بحران پر گہری تشویش کا اظہار کیا۔

وزیراعظم شہباز شریف نے ایران پر اسرائیل کے حملوں اور بعد ازاں بعض برادر خلیجی ممالک پر ہونے والے افسوسناک حملوں کی شدید مذمت کی۔وزیراعظم نے انڈونیشیا کے صدر کو موجودہ بحران کے تناظر میں خلیجی ممالک کے ساتھ پاکستان کی جاری سفارتی رابطہ کاری اور کوششوں سے بھی آگاہ کیا۔گفتگو کے دوران دونوں رہنماؤں نے اس بات پر اتفاق کیا کہ خطے میں کشیدگی کم کرنے کے لیے تمام فریقین کو تحمل اور بردباری کا مظاہرہ کرنا چاہیے۔دونوں رہنماؤں نے اس امر پر بھی زور دیا کہ تمام مسائل کو تعمیری بات چیت اور سفارت کاری کے ذریعے حل کرنے کے لیے سنجیدہ اور مخلصانہ اقدامات کیے جائیں۔وزیراعظم شہباز شریف نے اس موقع پر انڈونیشین صدر کو افغانستان سے متعلق حالیہ پیش رفت سے بھی آگاہ کیا۔