دوستانہ،تاریخی تعلقات کا اعادہ، وزیراعظم کے دورہ آسٹریا کا مشترکہ اعلامیہ جاری

وزیراعظم پاکستان محمد شہباز شریف کے دورہ آسٹریا کے دوران دونوں ممالک کے دوستانہ اور تاریخی تعلقات کو مزید مستحکم کرنے کا مشترکہ اعلامیہ جاری کر دیا گیا۔

دفتر خارجہ کے ترجمان کے مطابق جمہوریہ آسٹریا کی حکومت کی نمائندگی وفاقی چانسلر کرسٹین سٹاکر نے کی، جبکہ پاکستان کی نمائندگی وزیرِ اعظم شہباز شریف نے کی۔ یہ دورہ 1956 میں دونوں ممالک کے درمیان سفارتی تعلقات کے قیام کی 70 ویں سالگرہ کے موقع پر ہوا۔اعلامیہ کے مطابق دونوں رہنماؤں نے اقتصادی تعاون، تجارت، سرمایہ کاری، تعلیم، صحت، آئی ٹی، سیاحت اور انسانی وسائل کی ترقی سمیت مختلف شعبوں میں دوطرفہ تعلقات کو مزید مضبوط بنانے پر اتفاق کیا۔ فریقین نے اقوامِ متحدہ کے کثیرالجہتی نظام، عالمی امن و سلامتی، پائیدار ترقی اور انسانی حقوق کے فروغ میں تعاون کی ضرورت پر بھی زور دیا۔دونوں رہنماؤں نے آسٹریا اور پاکستان کی معروف کمپنیوں کے مشترکہ فورم کی صدارت بھی کی اور زیرِ غور مختلف مفاہمتی یادداشتوں کو جلد حتمی شکل دینے پر اتفاق کیا۔ وزیرِ اعظم شہباز شریف نے آسٹریا کی کاروباری برادری کو اپریل میں اسلام آباد میں منعقد ہونے والے یورپی یونین-پاکستان بزنس فورم میں شرکت کی دعوت دی، جبکہ وفاقی چانسلر کو مستقبل میں پاکستان کے دورے کی دعوت بھی دی گئی۔اعلامیہ میں یہ بھی بتایا گیا کہ دوطرفہ تعاون کو فروغ دینے کے لیے قائم مکالماتی ڈھانچوں پر مزید تعمیر اور باہمی تبادلے جاری رہیں گے، تاکہ دونوں ممالک کے تعلقات کو نئے اقتصادی اور سماجی مواقع سے فائدہ پہنچے۔