وزیراعظم کی دوحہ میں قطری ہم منصب سے ملاقات، خطے میں تنازعات کے پُرامن حل پر زور

وزیراعظم شہباز شریف کی دوحہ میں قطرکے وزیر اعظم اوروزیر خارجہ شیخ محمد بن عبدالرحمن بن جاسم الثانی سے ملاقات ہوئی۔ جس میں دو طرفہ تعلقات اور عالمی پیش رفت پر تبادلہ خیال کیاگیا۔۔ ملاقات میں نائب وزیراعظم اسحاق ڈار،  چیف آف ڈیفنس فورسز فیلڈ مارشل سید عاصم منیر، وفاقی وزیر اطلاعات و نشریات اور وزیراعظم کے معاون خصوصی طارق فاطمی بھی شریک ہوئے۔

ملاقات کے دوران دونوں رہنماؤں نے دو طرفہ تعلقات کے علاوہ  علاقائی اور بین الاقوامی امور پر بات چیت کی۔ اس موقع پر پاکستان اور قطر کے درمیان مضبوط برادرانہ تعلقات کا اعادہ کیاگیا اور سیاسی، اقتصادی اور ادارہ جاتی روابط میں بڑھتی ہوئی رفتار پر اطمینان کا اظہار کیا گیا۔

ملاقات میں تجارت اور سرمایہ کاری، توانائی، دفاع، افرادی قوت اور ثقافتی شعبے میں تعاون بڑھانے پربھی  بات چیت ہوئی۔  مشترکہ وزارتی کمیشن اور دو طرفہ سیاسی مشاورت سمیت حالیہ اعلیٰ سطح کی مصروفیات اور ادارہ جاتی میکانزم کے دوران کیے گئے فیصلوں پر عمل درآمد کی اہمیت پر زور دیاگیا۔

علاقائی مسائل بشمول غزہ میں پیشرفت اور خلیج کی سلامتی کے وسیع تر امور پر بھی تبادلہ خیال کیا گیا۔ وزیراعظم نے خطے میں مذاکرات کے فروغ اور کشیدگی میں کمی کے لیے قطر کی تعمیری سفارتی کوششوں کو سراہا۔ دونوں رہنماؤں نے تنازعات کے پرامن حل اور اقوام متحدہ کے چارٹر سمیت بین الاقوامی قوانین کی پاسداری کی اہمیت پر زور دیا۔

ملاقات میں پاکستان اور قطر کے درمیان اسٹریٹجک شراکت داری کو مزید مضبوط بنانے اور دوطرفہ، علاقائی اور بین الاقوامی مسائل پر رابطے میں رہنے کے مشترکہ عزم کا اعادہ بھی کیا گیا۔