وزیراعظم شہباز شریف کا ہنگامی اجلاس؛ علاقائی صورتحال کے پیشِ نظر ایندھن کی بچت اور سخت کفایت شعاری اقدامات نافذ

وزیراعظم محمد شہباز شریف کی زیر صدارت خطے کی موجودہ صورتحال کے پیش نظر ایندھن کی بچت اور کفایت شعاری کے اقدامات کا جائزہ اجلاس منعقد ہوا۔

اجلاس میں وزیرِ اعظم کو اقدامات کی پیش رفت سے آگاہ کیا گیا، اور ہدایات پر عملدرآمد کو یقینی بنانے کی ہدایات جاری کی گئیں۔ انٹیلی جنس بیورو تمام اقدامات پر نگرانی رپورٹ پیش کرے گا۔ بریفنگ میں بتایا گیا کہ ملک میں پیٹرولیم مصنوعات اور ادویات کا مناسب ذخیرہ موجود ہے، اور سپلائی چین کو بہتر بنانے کے لیے وزیر پیٹرولیم متحرک رہیں گے۔

اجلاس میں یہ بھی بتایا گیا کہ سرکاری محکموں میں تیل کی کٹوتی اور ورک فرام ہوم کے اقدامات مثبت نتائج دے رہے ہیں اور عوام کو ریلیف فراہم کر رہے ہیں۔ خصوصی کنیکٹیویٹی انتظامات وزارت انفارمیشن ٹیکنالوجی و ٹیلی کام کی جانب سے فراہم کیے جا چکے ہیں۔

اجلاس میں نائب وزیراعظم اور وزیر خارجہ اسحاق ڈار، وفاقی وزرا محمد اورنگزیب، علی پرویز ملک، احد خان چیمہ، عطاء اللہ تارڑ، ڈاکٹر مصدق ملک، شزا فاطمہ، بلال اظہر کیانی، معاون خصوصی طارق باجوہ، گورنر اسٹیٹ بینک جمیل احمد اور دیگر اعلیٰ سرکاری افسران نے شرکت کی۔