آزادفلسطینی ریاست کا قیام ناگزیرہے، غزہ میں جنگ بندی کی خلاف ورزیاں روکی جائیں،  وزیراعظم شہبازشریف

وزیراعظم شہباز شریف کا کہنا ہےکہ غزہ میں پائیدار امن ہمارا مشن ہے، آزاد اور خود مختار فلسطینی ریاست کا قیام پائیدار  امن کے لیے ناگزیر ہے اور فلسطینیوں کا حق ہے۔ غزہ میں جنگ بندی کی خلاف ورزیاں روکی جائیں۔

واشنگٹن میں امریکی صدر ڈونلڈ ٹرمپ کی زیر صدارت  غزہ  پیس بورڈ کے پہلے اجلاس سے خطاب کرتے ہوئے وزیراعظم  کا کہنا تھا کہ غزہ پیس بورڈ کے افتتاحی اجلاس میں شرکت باعث افتخار ہے، غزہ میں پائیدار امن ہمارا مشن ہے۔دعا ہےکہ غزہ میں پائیدار امن کے حصول میں کامیاب ہوں، مشرق وسطیٰ میں امن کے لیے آج کا دن تاریخ کا سنہری باب ہے۔

وزیراعظم شہباز شریف نےمطالبہ کیاکہ  سلامتی کونسل کی قراردادوں کے مطابق فلسطینیوں کو ان کا حق دیا جائے، آزاد اور خود مختار ریاست فلسطینیوں کا حق ہے، دیرپا امن کے لیے غزہ میں سیزفائر کی خلاف ورزیاں بند ہونی چاہئیں۔

ان کا کہنا تھا کہ  تنازعات کے حل کے لیے صدر ٹرمپ کا کردار قابل تحسین ہے، صدر ٹرمپ کی بروقت مداخلت سے پاک بھارت جنگ رکی، پاک بھارت جنگ بندی سے ہزاروں قیمتی جانیں بچ گئیں۔