پیر محل میں مبینہ پولیس مقابلہ، 2 ملزم ہلاک،2 فرار ہونے میں کامیاب

گاؤں 663/4 گ ب کے قریب مبینہ پولیس مقابلے کے دوران فائرنگ کے تبادلے میں دو ملزمان ہلاک ہو گئے۔

پولیس حکام کے مطابق ناکابندی کے دوران دو موٹر سائیکلوں پر سوار 4 مشکوک افراد کو رکنے کا اشارہ کیا گیا تو انہوں نے پولیس پارٹی پر جان لیوا فائرنگ شروع کر دی۔ پولیس کی جوابی فائرنگ میں دو ملزمان شدید زخمی ہو گئے، جنہیں فوری طبی امداد کے لیے ہسپتال منتقل کیا جا رہا تھا تاہم وہ راستے میں ہی زخموں کی تاب نہ لاتے ہوئے دم توڑ گئے۔

پولیس نے بتایا کہ ہلاک ہونے والے ملزمان کی شناخت 681/22 گ ب کے رہائشی شعیب ولد اختر اور عامر ولد یاسین کے ناموں سے ہوئی ہے، جبکہ ان کے قبضے سے نجی اسلحہ بھی برآمد کر لیا گیا ہے۔ پولیس حکام کے مطابق ہلاک ملزمان کا سابقہ کریمنل ریکارڈ چیک کیا جا رہا ہے اور اندھیرے کا فائدہ اٹھا کر فرار ہونے والے ان کے دیگر دو ساتھیوں کی گرفتاری کے لیے علاقے میں سرچ آپریشن شروع کر دیا گیا ہے۔